ಕವಿಯಿತ್ರಿ ಶೋಭ ಮಲ್ಕಿಒಡೆಯರ್ ಅವರು ವಿಶ್ವ ಗುಬ್ಬಚ್ಚಿ ದಿನಾಚರಣೆಯ ಅಂಗವಾಗಿ ಗುಬ್ಬಚ್ಚಿ ಕವನ ರಚಿಸುವ ಮೂಲಕ ಶುಭಾಶಯಗಳನ್ನು ಕೋರಿದ್ದಾರೆ. 🍀💐ಎಲ್ಲಾ ಕಾವ್ಯಪ್ರಿಯರಿಗೆ ವಿಶ್ವ ಗುಬ್ಬಚ್ಚಿ ದಿನದ ಶುಭಾಶಯಗಳು🍀💐 (ಸಂಪಾದಕರು)
🐥 ಗುಬ್ಬಚ್ಚಿ 🐥
ಚಿವ್ – ಚಿವ್ ಗುಬ್ಬಚ್ಚಿಯ ಸ್ವರವನು ಆಲಿಸಲು
ಆನಂದ ಅತೀ ಮಧುರ
ಅದರ ಕಲರವ ಕೇಳಲು ಚಿಣ್ಣರ ಮನಸು
ಸಂತಸದಿ ಹಗುರ //
ಕಿಚಿಪಿಚಿ ಸದ್ದನು ಮಾಡುತ ಬಂದಿತು
ಗುಬ್ಬಚ್ಚಿಯು ಮನೆಯೊಳು ಹಾರಿ
ಪ್ರೀತಿಯ ಸ್ವಾಗತ ತೋರಿದರು
ಮನೆಯವರೆಲ್ಲರೂ ಸೇರಿ //
ಮಕ್ಕಳು ಆಡುವ ಆಟವ ನೋಡುತ
ಕತ್ತನು ತಿರುಗಿಸುವುದು ಕ್ಷಣ ಕ್ಷಣದಿ
ಚಪ್ಪಾಳೆ ತಟ್ಟಿ ಖುಷಿಯಿಂದ ಕುಣಿದಾಗ
ತಾನೂ ಪುಕ್ಕವ ಬಡಿಯುವುದು ಸಂತಸದಿ //
ಗೂಡನು ಕಟ್ಟಲು ಸಂಭ್ರಮದಿ
ಆಯ್ದು ತಂದಿತು ಹುಲ್ಲು ಕಡ್ಡಿ ಕೊಕ್ಕಿನಲಿ
ಕಾಳು ಕಡಿ ಹಾಕಲು ಸಂತಸದಿ ಕುಣಿಯಿತು
ತಾನೂ ಒಂದಾಯ್ತು ಆ ಮನೆಯಲ್ಲಿ //
ಮುದ್ದು ಮಾಡುವ ಮನೆಯವರ ಸ್ಮರಿಸಿ
ಆಹಾರ ಅರಸುತ ಹಾರುವುದು ಬಾನಿನೆಡೆಗೆ
ಸಂತೃಪ್ತಿಯಿಂದ ಮರಳಿ
ನೆಮ್ಮದಿ ಕಾಣುವುದು ಗೂಡೊಳಗೆ //
-ಶೋಭಾ ಮಲ್ಕಿ ಒಡೆಯರ್✍🏻
ಹೂವಿನ ಹಡಗಲಿ