ಕಾರ್ಮಿಕ ದಿನಾಚರಣೆಯ ಶುಭಾಶಯಗಳೊಂದಿಗೆ🍀💐
ಶ್ರಮಿಕರು
ಶ್ರಮಿಸುವ ಶ್ರಮಿಕರು
ನೆನಪಿಗೆ ಬರುವರು ಇಂದು
ಅದುವೇ ಕಾರ್ಮಿಕರ ದಿನಾಚರಣೆ
ವಿಶೇಷವಿಹುದು ಮೇ ಒಂದು ||
ಹಸಿವು ಬಾಯಾರಿಕೆಯ ಹಂಗಿಲ್ಲದ ದುಡಿತ
ಅಹೋರಾತ್ರಿ, ಬದುಕಿನ ಗಂಜಿಗಾಗಿ
ಪುಡಿಗಾಸು ಗಳಿಕೆಯಲ್ಲೇ ತೃಪ್ತಿ ಪಡುವ ಜೀವ
ನಿತ್ಯ ನಿಂತಿದೆ, ಭವಿಷ್ಯ ಸವಾಲಾಗಿ ||
ನಿನ್ನವರ ಗೇಣು ಹೊಟ್ಟೆ – ಬಟ್ಟೆ ಮುಚ್ಚಲು
ಅವಿರತ ಸಹನೆಯ ಹೋರಾಟ
ನಿನ್ನೊಳಗೆ ನಿನ್ನತನವ ಮೆಟ್ಟಿ ನಿಲ್ಲಲು
ಸಮಾಜದೊಳು ಕೂಗು, ಬರೀ ಹಾರಾಟ ||
ಪುಟ್ಟ – ಪುಟ್ಟ ಮಕ್ಕಳೂ ಹೆಜ್ಜೆ ಹಾಕುತ್ತಿವೆ
ಹೆತ್ತವರೊಂದಿಗೆ , ಶಾಲೆಯ ಮೆಟ್ಟಿಲು ಏರದೆ !
ಸರಕಾರ ಯೋಜನೆ ರೂಪಿಸಿದರೂ
ಎಲ್ಲೆಲ್ಲೊ ಸೋರಿ ಹೋಗುತಿದೆ ಕೈಗೆ ದಕ್ಕದೆ ||
ರಾಜ್ಯದಾದ್ಯಂತ ಬರೀ ಘೋಷಣೆಯ ಕೂಗು
ದಣಿಗಳ ಹಿಡಿತದಲ್ಲಿ ಜೀತದಾಳುಗಳ ಅಳಲು
ಇಂದಿಗೆ ನಿಲ್ಲುವುದೆ !? ಪೀಳಿಗೆಗಳ ಪಾರಂಪರ್ಯ
ಇದುವೇ ಕಾರ್ಮಿಕರ ಅಹವಾಲು ||
-ಶೋಭಾ ಮಲ್ಕಿ ಒಡೆಯರ್🖊️
ಹೂವಿನ ಹಡಗಲಿ
*****