ಕಾಲಲ್ಲಿ ಹೊಸಕುತಿದ್ದ
ಕ್ರೌರ್ಯದ ಜಗತ್ತು, ಎಟುಕಲಾರದ
ನನ್ನನ್ನೂ ತಲೆ ಎತ್ತಿ ನೋಡಿ
ಕೈ ಕೈ ಹೊಸಕುತಿತ್ತು
**
ಹೃದಯ ಮಾತಾಡುವಾಗ
ಮಿದುಳು ಮಲಗಿತ್ತು
ಮಿದುಳು ಮಾತನಾಡತೊಡಗಿತು ನೋಡು
ಹೃದಯ ಸ್ತಬ್ಧವಾಯಿತು
**
ಸಿಹಿ ಕಂಡೊಡನೆ ಇರುವೆ
ಮುತ್ತುವುದಂತೆ ಮೋಸದ ಜಗತ್ತು
ವಿಷದ ಗುಳಿಗೆಗೆ ಸಿಹಿಯ ಲೇಪಿಸಿತ್ತು..
**
ಹೃದಯಕ್ಕೂ ಮಿದುಳಿಗೂ
ಪ್ರೇಮ ಉಂಟಾಯಿತು
ಹಡೆದ ಮಕ್ಕಳಲ್ಲಿ ಕೆಲವಕ್ಕೆ ಹೃದಯ,
ಕೆಲವಕ್ಕೆ ಮಿದುಳಷ್ಟೇ ಇದ್ದದ್ದೂ
ಸೋಜಿಗವೆನಿಸಲಿಲ್ಲ
**
ಅವನ ಎದೆಯ ಮೇಲಿನ
ಹಚ್ಚೆಯಾಗಷ್ಟೇ ಉಳಿದೆ ಒಳಗೆ
ಮೂಡಿದ ಮತ್ತೊಂದು ಹೆಜ್ಜೆ
ಅರಿವಿಗೆ ಬರಲಿಲ್ಲ.
-ಹೇಮಲತಾ ಮೂರ್ತಿ, ಬೆಂಗಳೂರು
*****