ಗಝಲ್
ಎನ್ನ ಹೃದಯದಲ್ಲಿ ಪ್ರೀತಿ ಅರಳಿ ಮೂಡಿದಾಗ
ಮೊದಲು ಕಂಡ ಕನ್ಯೆಯು ನೀನಲ್ಲವೇ? ನನ್ನ ಗೆಳತಿ //
ಮನಸ್ಸು – ಮನಸ್ಸುಗಳು ಒಂದಾಗಿ ಸಮ್ಮತಿಸಿ
ಎನ್ನ ಕೈಯ ತಾಳಿಗೆ ಕೊರಳೊಡ್ಡಿದವಳು ನೀನಲ್ಲವೇ ? ನನ್ನ ಸತಿ //
ಮನೆ – ಮನದ ಬಾಗಿಲು ತೆರೆದು ಬಲಗಾಲಿಟ್ಟು
ಒಳಬಂದು ದೀಪ ಬೆಳಗಿದವಳು ನೀನಲ್ಲವೇ ? ನನ್ನಸಂಗಾತಿ //
ಭವಿಷ್ಯದಲ್ಲಿ ಭದ್ರ ಭರವಸೆಗಳ ತುಂಬಿ
ಕರದಲ್ಲಿ ಕರವಿಟ್ಟು ನಡೆಯೋಣವೆಂದವಳು ನೀನಲ್ಲವೇ ? ನನ್ನ ಸುಮತಿ //
ಏಳು – ಬೀಳುಗಳ ಅರ್ಥೈಸಿಕೊಂಡು ಸರಿಯಾದ ದಾರಿಯಲ್ಲಿ
ನಡೆಯಲು ಸಹಕರಿಸಿದವಳು ನೀನಲ್ಲವೇ ? ನನ್ನ ಮನೆಯೊಡತಿ //
ಮಕ್ಕಳ ಬೇಕು ಬೇಡಗಳೊಂದಿಗೆ ನನ್ನನ್ನೂ ಮಗುವಿನಂತೆ ಪೋಷಿಸಿ, ಸಹಿಸಿಕೊಂಡವಳು ನೀನಲ್ಲವೇ ? ನನ್ನ ಮನದೊಡತಿ //
ಕರದಲ್ಲಿ ಕರವಿಟ್ಟು ನೀನಿಡುವ ಹೆಜ್ಜೆಗೆ ಜೊತೆ – ಜೊತೆಯಲ್ಲಿ
ನಾನೂ ಬರುವೆ ಎಂದು ಭರವಸೆ ತುಂಬಿದವಳು ನೀನಲ್ಲವೇ? ನನ್ನ ಹೆಂಡತಿ //
👆ಶೋಭಾ ಮಲ್ಕಿ ಒಡೆಯರ್
ಹೂವಿನ ಹಡಗಲಿ
