ಕರ್ನಾಟಕ ರತ್ನ, ಡಾ. ಪುನೀತ್ ರಾಜ್‍ಕುಮಾರ್ ಅವರು ನಮ್ಮನ್ನಗಲಿ ಇಂದಿಗೆ (ಅ. 29) ಒಂದು ವರ್ಷ. ಜನಮಾನಸದಲ್ಲಿ ಅಚ್ಚ‌ಹಸಿರಾಗಿರುವ ಡಾ. ಪುನೀತ್ ರಾಜಕುಮಾರ್ ಅವರ ಸವಿನೆನಪಿಗಾಗಿ ತಮ್ಮ ಹನಿಗವನಗಳ ಮೂಲಕ ಅಕ್ಷರ ನಮನ ಸಲ್ಲಿಸಿದ್ದಾರೆ ಕವಯತ್ರಿ ಶೋಭ ಮಲ್ಕಿಒಡೆಯರ್ ಅವರು!
*ಸುಕೃತ*
ಅಭಿಮಾನಿ ದೇವರುಗಳೆಂದೇ
ಸಂಬೋಧಿಸುತ್ತಿದ್ದ ಅಣ್ಣಾವ್ರ
ಮಗನಾದೆ ಪುನೀತ ;
ನೀನು ಕೋಟ್ಯಾಭಿಮಾನಿಗಳಿಗೆ
ದೇವರಾಗಿ ಜನರ ಹೃದಯದಲ್ಲಿ
ನೆಲೆಸಿದ್ದು ಕರ್ನಾಟಕದ ಸುಕೃತ
*ಅಪ್ಪು*
ಇಷ್ಟು ಬೇಗ “ಪರಮಾತ್ಮ” ನಲ್ಲಿ
ಲೀನವಾದೆ ಅಪ್ಪ – ಅಮ್ಮನ
ಪ್ರೀತಿಯ ಪುತ್ರ ಅಪ್ಪು;
” ಜೇಮ್ಸ್ ಬಾಂಡ್ ” ನ
ನೋಡುವ ಆಸೆ ಅದಮ್ಯವಾಗಿರುವಾಲೇ
ಸಾವು ಬಂದೆರಗಿದ್ದು
ಖಂಡಿತಾ ತಪ್ಪು
*ಸ್ಥಾನ*
ನೀನು ಮಾಡಿದ
ಸಮಾಜ ಸೇವೆಗೆ ಪಡೆದೆ
ಎಲ್ಲರ ಹೃದಯದೊಳು ಸ್ಥಾನ ;
ಕೊಡುಗೈ ದಾನಿಯಾದ
” ನಮ್ಮ ಬಸವ ” ನಿಗೆ
ಯಾಕೀ ಅವಸರದ ಮರಣ.
*ಆಕಾಶ*
ತಂದೆಗೆ ತಕ್ಕ ಮಗನಾಗಿ
” ಅಭಿ “ಮಾನಿಗಳ ಹೃದಯದಲ್ಲಿ
ಪ್ರೀತಿ ಪಡೆದೆ
” ಆಕಾಶ “ದೆತ್ತರ ;
ಎಲ್ಲರ ಮನೆ ಮನದಲ್ಲೂ
ಶಾಶ್ವತವಾಗಿ ನೆಲೆಸಿ
ಅಜರಾಮರನಾದ
” ರಾಜಕುಮಾರ “.
-ಶೋಭಾ ಮಲ್ಕಿ ಒಡೆಯರ್ ✍🏻
ಹೂವಿನ ಹಡಗಲಿ
*****