ಅನುದಿನ ಕವನ-೪೪೮, ಕವಿ: ಸಿದ್ಧರಾಮ ಕೂಡ್ಲಿಗಿ, ಕಾವ್ಯ ಪ್ರಕಾರ: ಗಜಲ್

ಗಜಲ್

ಕತ್ತಲಾಗುವುದರೊಳಗೆ ನಿನ್ನನು ನೋಡಬೇಕು ಒಮ್ಮೆ
ನೆರಳು ಕರಗುವುದರೊಳಗೆ ಜೊತೆಯಾಗಬೇಕು ಒಮ್ಮೆ
–
ಉಸಿರ ಹಣತೆಯೋ ಹೊಯ್ದಾಡುತಿದೆ ಚಣಕೊಮ್ಮೆ
ಗಾಳಿ ಸುಳಿವುದರೊಳಗೆ ನಿನಗಾಗಿ ಬೆಳಗಬೇಕು ಒಮ್ಮೆ
–
ದಿಟ್ಟಿಯ ಚಿಟ್ಟೆ ರೆಕ್ಕೆಯರಳಿಸುವುದೋ ಇಲ್ಲವೋ
ಹಾರುವ ಮುನ್ನ ನಿನ್ನಂತರಂಗದಿ ಕೂರಬೇಕು ಒಮ್ಮೆ
–
ಕಾಯುವಿಕೆಯ ಮೊಂಬತ್ತಿ ಕರಗುತಿದೆ ಬಲುಬೇಗ
ಕುಡಿ ಆರುವುದರೊಳಗೆ ನಿನ್ನನು ಕಾಣಬೇಕು ಒಮ್ಮೆ
–
ಸಿದ್ಧನ ಪ್ರತಿ ಗಜಲೊಳು ಅಡಗಿಹುದು ನಿನ್ನ ಪ್ರೇಮ
ಪದ ಮೌನವಾಗುವ ಮುನ್ನ ನೀನು ಹಾಡಬೇಕು ಒಮ್ಮೆ

-ಸಿದ್ಧರಾಮ ಕೂಡ್ಲಿಗಿ
*****